23.11.09

Á flogi við Charley





Myndir frá flogferðini úr Dublin, har vit heintaðu Charley Pride leygarmorgunin, úr Sandavági og av Parnassinum á Hotel Hafnia (Myndir: Asbjørn Knudsen, Allan Samuelsen og Birgir Kruse)

Umborð á flogfarinum hjá Atlandsflogi var nógv at tosa um. Charley Pride hevði ferðast ein mánað í Írlandi og var spentur at hoyra um hetta landið, ið hann ikki kendi, men sum tó hevði uppruna í júst Írlandi. Men ikki skilti hann, hvussu írsku munkarnir funnu higar. Men víkingar kendi hann nógv til og vildi hoyra hvussu ymisk nøvn og hugtøk vórðu úttalaði. Charley gongur nógv upp í stjørnutekin, nær ein er føddur og hvat, ið er eins mótsetningur. Serliga fegin var Charley at lesa týddu greinina Kjølfest í Klaksvíksblaðnum Leikar í Lund og at síggja eitt fotoalbum hjá pápa mínum frá St. Johns í Nýfunnlandi 1961. Hann vildi eiga Klaksvíksblaðið og tað var sjálvandi lagamanni. Umboðsmaðurin John Daines fylgir við í øllum hjá Charley. Teir hava samstarvað í 30 ár og vita hvussu ein orkar at halda á on the road so leingi sum Charley, ið er 71 ára gamal. Í kirkjugarðinum í Sandavági var serliga spennandi at tosa við Charley meðan aldurnar spældu á sandi, og sólin setti. Kalt var, so Charley knappaði sær jakkan. Eftir drúgva sjónvarpssamrøða á Parnassinum á Hotel Hafnia morgunin eftir, gav eg Charley eitt fløgusavn, ið lýsir svartar stjørnur, ið syngja country From Where I Stand - The Black Exprience in Country Music. Helt, at fløgusavnið gjørdi størri nyttu heima hjá honum. Best umboðaður er júst Charley sjálvur. Hann kendi ikki útgávuna, men allar sangararnar, ið vóru við á teim trimum fløgunum. Charley Pride var ein stuttligur, livandi og vitugur maður at møta.