Var til sangleikin Audition sunnukvøldið 18. november. Tað
eru skúlanæmingar í Havn, sum við støði í tónleiki hjá Tróndi Bogasyni og
teksti hjá Dániali Hoydal, hava framført henda effektfulla leikin, sum varir
tríggjar tímar, fyri fullum Norðurlandahúsi frá 16. november til í gjár, 4.
desember.
Og tá eg sigi framføra, so merkir tað alt frá pallsmíði og
búnum til tónleik, dans og sjónleik. Framførslan, sum Annfinnur Heinesen
stjórnar, er so framúr, at tú undrast og
spyrt teg sjálvan, um heimliga fjøldin av ungfólki við góðum gávum,
talentmassin, er endaleys. Showið er bara so framúr. Alt undir meistarligu
hond Annfinns.
Undir kønu hond Jóannesar Gaard hava vit risastóra pallin,
sum Tekniski Skúli í Havn hevur evnað til, eins og búnar og smyrsl.
Handverkið duga tey, og ikki minst tónleikin frá Musikkskúlanum, sum Hans Pauli Tórgarð stjórnaði og so dansin, sum Vígdis Hentze Olsen stóð fyri. Meistarligt show.
Av triðju røð helt eg tó, at stóra pallmyndin varð lítið
ágangandi, tá tað galt livandi sjónvarpsmyndina á staðnum. Hon var bara at
síggja ytst til høgru, longst frá har eg sat. So ágangandi, sum leikurin annars
var við jøvnum larmi, og einum skakandi bumbubresti beint fyri steðgin, so kundi
eg hugsað mær at sjónvarpsskíggin var nógv størri, og helst á fleiri flatum um
allan horisontin, heldur enn bara á einum frímerki uppi til høgru. Miðlaði
veruleikin er jú fremsta søgan í leikinum, sum eg skilji hann.
Ein evropeisk sangkapping, Audition, kanska ein Eurovision
Song Contest, ella Global Battle of the Bands, er kjarnin í søguni, sum er
hongd upp á klisjéina Evropasamveldið, og melur um rótleys ung har eysturi og vesturi
í Evropa. Her eru so nógvir træðrir, at ilt er at halda skil á søguni og teim
enn tynri træðrum, sum onkur heldur eiga at hanga uppií. Sum áskoðari fært tú ein
afturvendandi trupulleika at skapa meining í øllum meldrinum, skal alt
ikki bara svølgjast sum tað bera ovfarakæti hjá fittum skúlanæmingum.
Tá tú eina løtu fært fatur á einum tráði, er ein annar har og
uppaftur fleiri, so tú gevst at finna logikkin í søguni og zoomar út, heilt
út, har eingir kantar hómast. Tá verður leikurin ein flipputur tra-la-la
leikur, berføttur, umleið tá Woodstock var tíðarbærur. Henda forniska tíðarmynd
verður negld føst í mínum huga, tá eg tvær ferðir verði førdur inn á vesið hjá
leikarunum, sum uttan forkláring skíta og koyra buksur upp og niður, eisini við
hjálp frá hinum kyninum. Surrealistiska pallmyndin við vesikummum stavar úr
filminum Le Fantôme de la liberté (Luis Buñuel 1974). Tvey ár undan hevði sami
filmiski surrealistur, spanski Buñuel (1900-1983), gjørt filmin Le charme
discret de la bourgeoisie (1972), har fólk ganga við berari reyv og tænastufólk
verða brúkt sum kaffiborð, sum eisini sást aftur eina løtu í Audition. Queen
sangurin Bohemian Rhapsody (1975) sæst nakrar ferðir aftur handan skíggjan, men hetta tykist
sum ein kreativ bjargingarroynd hjá leikstjóranum og teim ungu at fáa sum
frægast burturúr leysu søgubrotunum.
Hví fær Føroya dugnaligi ungdómur ikki betri tekst at
arbeiða við?
Longu frumsýningarkvøldið skrivaði ein ummælari, at
hetta var ársins uppliving við “sjáldsama væl skrivaðum teksti, tær løttu,
fleirtýddu orðingarnar flúgva um pallin. Teksturin er góður, stuttligur og
situr væl.” Men tá leikurin er av síggi eg, at ummælarin er sjálvur á takkarlistanum.
Framhaldandi kann vera spurt, um hetta var rætti staður
at framføra henda leik, so ósamhangandi hann var sum søga. Sum áskoðari úr almenna
rúminum, sum ikki er studentaskúlanæmingur, vil eg síggja ein leik á hægri
stigi enn hetta í Norðurlandahúsinum. Hesin leikur flutti meg aftur til ta
tíð, tá eg sjálvur gekk í Hoydølum og kom á Kostdeildina í 1975. Alt gott um ta
tíðina, men tá framførdu tey ikki leikir í hølum, ið kundu javnmetast við hetta
húsið. Hinvegin kann eg eisini grína, mest at mær sjálvum, tí eg kann síggja
meg sjálvan í einum avoldaðum skúla, sum hóast hann vil øllum alt tað besta,
ikki er ein dag yngri enn tá Queen góvu út A Night at the Opera. Men eg haldi
ikki at tað var ætlanin. Næstu ferð má Studentaskúlin koma við eini nógv betri søgu.