26.8.15

Atgongumerkjasølan er byrjað!

Hvíta løriftið í Havnar Bio bleiktrar av berari filmsgóðsku í døgunum 9.-13. september í 2015. Tá síggjast 5 filmar í 5 dagar fyri 300 krónur. Harafturat ert tú við í kappingini um eina ferð fyri 2 til Edinburgh í Skotlandi í juni 2016 á elsta filmfestival á okkara leiðum, The Edinburgh International Film Festival.


5 FYRI 300: Fert tú í forhøllina í Havnar Bio og keypir atgongumerki til allar fimm filmarnar, so fært tú tey fyri 300 krónur. Keypir tú støk atgongumerki, antin við skivuna ella á netinum, so kosta tey 90 kr hvørt, ella 450 krónur tilsamans. Hálvtannaðhundrað krónur eru sostatt at spara við skivuna.


í Havnar Bio 9/9 kl 20:00Intro í Kaffihúsinum kl 19:00 
Jan Højgaard, formaður í Fiskimannafelagnum


Fyrsti filmur er ein eksperimenterandi amerikanskur fiskivinnufilmur, LIVJATAN. Hetta er dýrið í sjónum, sum bíbliusøgur siga um. Amerikanski heimildarfilmurin úr Norðuratlantshavi hevur tikið navn úr hesum bíbliusøgum. Á nýskapandi surrealistiskan hátt lýsir LIVJATAN sjólívið, sum tað sæst og hoyrist, uttan orðaskifti og frágreiðingar. Við fleiri smáum GoPro myndatólum fylgja vit manningin á botnfiskabátinum Athenu, ið er ein av 500 úr havnabýnum New Bedford í Massachusetts, har eisini søgan um Moby Dick stavar. Tey, ið hava gjørt filmin, eru bæði tvey mannfrøðingar, ið eisini starvast sum listafólk. Bretski Lucien Castaing-Taylor er leiðari á The Sensory Ethnography Lab á Harvard Universitetinum í Cambridge í Massachusetts, og franska Véréna Paravel starvast á The Museum of Modern Art í New York. Umframt granskingarstørvini, hava bæði gjørt fleiri listaliga nýskapandi filmar um evnini, tey granska. Eitt nú hevur Lucien gjørt film um bøndur og seyðahald í Montana í filminum Sweetgrass. Í hesum filminum, LIVJATAN, lýsa tey sjálvt fiskivinnuarbeiðið, havið, maskinorkuna og medspælararnar, sum bæði eru menniskjað og umhvørvið. Meðan aldurnar duna, trossarnir spennast og maskinan hostar, ganga manning og granskarar við snurrandi myndatólum, so vit í spælifilmslongd fáa eina óvæntaða fatan av lívinum umborð, ikki minst í náttarmyrkrinum.



Fiskimannafelagið stuðlar og bjóðar skipskeks og Slupp-øl afturvið sýningini í Havnar Bio. Frá klokkan 19 og til á midnátt bjóðar Fiskimannafelagið til opið hús í Kaffihúsinum undir Bryggjubakka.

Leviathan (Lucien Castaing-Taylor & Verena Paravel, USA 90 min 2012)

Mikudag 9. september 2015 kl 20:00 í Havnar Bio



Hóskvøld í Havnar Bio 10/9 kl 20
Intro: Greta Svabo Bech, sangarinna

Fleiri heimildarfilmar um kendar persónar á altjóða tónleikapallinum eru komnir í ár. Tann filmur, ið flestu hava sæð og ummælarar hava verið fegnastir um í øllum okkara grannalondum, kemur nú til Havnar. Tað er filmurin um bretsku Amy Winehouse, sum doyði 27 ára gomul í 2011. BAFTA-vinnarin Asif Kapadia hevur gjørt henda hugtakandi biograffilmin, sum einans ber fornavnið á sangarinnuni, AMY. Umframt sjálvsagda tónleikin, sum gjørdi hana so væl umtókta, fáa vit innlit í heimalív, privatar filmsupptøkur og inniligar samrøður við familju og starvsfelagar í góðar tveir tímar. Amy Winehouse fekk fimm Grammyvirðislønir fyri útgávuna ”Back to Black í 2008”, sum higartil er mest selda tónleikaútgávan í Bretlandi í hesi øldini. Sjangran er klassiskur soultónleikur, R&B og blues. Sangarinnan Greta Svabo Bech fer at introdusera filmin um Amy Winehouse. Aftaná er høvið at vitja Sirkus og skifta orð um filmin.

Amy (Asif Kapadia, Bretland 128 min 2015)

Hósdag 10. september 2015 kl 20:00 í Havnar Bio


Fríggjakvøld í Havnar Bio 11/9 kl 19
Intro: Sunva Eysturoy Lassen, fotografur og fotolærari

Tað er fremsti evropeiski filmsleiksjórin seinastu mongu árini, Wim Wenders úr Týsklandi, sum í filminum THE SALT OF THE EARTH lýsir ferðandi fotografin Sebastiao Salgado. Wenders hevur gjørt filmin saman við Juliano Ribeiro Salgado, ið er sonur Sebastiao, sum í 40 ár hevur ferðast, at lýsa tær broytingar, sum menniskjan elvir til og er partur av um allan heim. Hann hevur eygleitt søguligar stórhendingar, altjóða tvístøður, stríðsmál og tá ein heil tjóð flýggjar. Nú kannar og avmyndar hann støð, har eingin hevur verið, og villini djór og plantur í stórbæra landslagnum: eitt fotografiskt avrik, sum neyvan hevur sæð sín líka, har Sebastiao Salgado fagnar heimsins vakurleika, frá hvítabjørnini á norðpólinum til gróðrarmikla frumskógina í syðra Afrika. Sunva Eysturoy Lassen, sum er fotografur, fotolærari á miðnámi og rekur fyritøkuna Mureldur, fer at introdusera ferðandi fotofilmin hjá Wim Wenders um Salgado. Aftaná er høvi at vitja Sirkus og skifta orð um filmin.

The Salt of the Earth (Wim Wenders & Juliano Ribeiro Salgado, Frakland, Brasil & Italia, 110 min 2014)

Fríggjadag 11. september 2015 kl 19:00 í Havnar Bio 



Leygarkvøld í Havnar Bio 12/9 kl 19
Intro: Herálvur Jacobsen, formaður í Lærarafelagnum

Saman við Lærarafelagnum bjóða vit til hesa sýning, har Viggo Mortensen er lærari í fronsku søguni hjá Albert Camus um frælsisbardagan í Algeria. Vit eru í 1954, tá Daru, ið er lærari í fronskum, fær til uppgávu at leiða Mohamed, sum er dømdur fyri morð, til næsta fangahús. Lærarin og Mohamed eru bygdafelagar og noyðast at samstarva á ferðini, tí arabiskir reiðmenn og hevndarfull niðursetufólk eru eftir teimum. Á vandamiklu ferðni knýta teir eitt óvantæð vinaband, ið skal bera ella bresta, tá Daru skal handa Mohamed til myndugleikarnar. Aftaná er høvi at vitja Sirkus og skifta orð um filmin.

Loin des hommes (David Oelhoffen, Frakland 101 min 2014)

Leygardag 12. september 2015 kl 19:00 í Havnar Bio




Sunnukvøld í Havnar Bio 13/9 kl 20
Intro: Theodor Eli Dam Olsen, formaður í Prestafelagnum

Saman við Prestafelagnum bjóðar Filmsfelagið og Havnar Bio til fimta og seinasta filmin. Hann er norskur og kallast 1001 GRAMM, og er um at máta hvørt nikk og prikk í sjónligu tilveruni. Leikstjórin Bent Hamer sigur søguna um vísindakvinnuna Mariu, sum er í starvi á Justervesenet, har alt verður vigað og mált, kilo og metrar. Tá søgan tekur við, skal Maria til París at kanna, um eitt kilo, sum er skrásett í Noregi, veruliga vigar tað sama sum í restini av heiminum. Á ferðini til franska høvuðsstaðin fer alt í smildur, og hon fer at leggja misnøgd og sorg, men at enda eisini kærleika, í vágskálina. Tá kemur hon eftir, at tann, ið einki hevur at bera, ber hina tyngstu byrðina. Aftaná sýningina verður drigið um vinningin, sum er ferð fyri tvey frá 62°N á filmfestival í Edinburgh. Eftir hetta er høvi at vitja Sirkus og skifta orð um filmin.

1001 Gram (Bent Hamer, Noreg & Týskland 93 min 2014)

Sunnudag 13. september 2015 kl 20:00 í Havnar Bio

Vinn eina ferð á 70 ára filmstevnu í Edinburgh


Ferðaskrivstovan 62°N stuðlar tiltakinum “Filmsdagar - í felag” í Havnar Bio. Stuðulin er eini ferð fyri tvey til Edinburgh International Film Festival, sum fyllir 70 ár í juni næsta ár. Tey, sum vilja vera við í kappingini um ferðina hjá 62°N til altjóða filmfestivalin í Edinburgh í 2016, skriva navn og telefonnummar aftanfyri á persónliga atgongumerkið, sum er eftir, tá kontrollørurin hevur fingið sín part, til tær sýningar, sum ganga undir heitinum “Filmsdagar - í felag” í Havnar Bio í døgunum 9.-13. september í 2015. Eftir sýningina verður atgongumerkið við áskrivaðum navni og telefonnummari á lagt í ein svartan kassa í forhøllini í Havnar Bio. Vinningurin, sum er eitt gávukort frá ferðaskrivstovuni 62°N, hevur eitt virði, ið er 10.000 krónur. Gávukortið kann eisini nýtast eftir egnum ynski. Drigið verður í biografhøllini eftir seinastu sýningina, sum byrjar sunnukvøldið 13. september í 2015 klokkan 20.

Filmsfelagið er eitt góðskumerki


Áhugafelagið, sum byrjaði í Havnar Bio í 1962, men ikki hevur verðið virkið síðani seinastu sýningarnar í Leikhús Bio í 1992, stendur fyri filmsúrvalinum. Í vanligu skránni hjá Havnar Bio ber Filmsfelagið boð um eitt slag av filmi, ið dregur ein áskoðaraskara til sín, sum ikki vanliga gongur í biograf. Heitið Filmsfelagið, sum ikki hevur verið brúkt í útvið fjórðingsøld, er soleiðis vorðið eitt góðskumerki. Hesa gongd vilja Havnar Bio og Filmsfelagið hjúkla um við sýningum alt árið, og serliga í september - men altíð í felag - tí tá er filmur bestur - í felag.

Ole Wich gjørdi øll búmerki