Í dag kom Soria Moria slott innan av havinum og stýrdi millum Stong og Eystnes inn á Skálafjørðin, hin longsta í landinum.
Eitt ævintýr úr okkara egna veruleika er byrjað, men maðurin, ið slær grasið og rakar saman á Hvítanesi, letst eins lítið um vón og seyðurin á bønum.
Veruliga navnið á ævintýraslottinum er West Hercules, sum Statoil leigar í Norðuratlantshavi. Hetta er ein djúphavs boripallur, sum er smíðaður á Daewoo skipasmiðjuni í Geoje í Suðurkorea í 2008. Flaggið er úr Panama, klassin er Det Norske Veritas, eigari er Seadrill Ltd, har 7.900 fólk eru í starvi, og umsitari er North Atlantic Drilling í Hamilton á Bermuda.
Dagur og Vika upplýsti í kvøld, at 400-500 fólk fara at verða knýtt at rigginum, meðan hann er á Skálafjørðinum í seks vikur. Rúm er fyri 180 fólkum umborð.
Á Skálafjøðrinum skal MEST skipa fyri at skrúvur og annað verður umvælt, innan riggurin heldur fram til Nýfundlands at bora í 18 mánaðir í Flemish Pass lægdini 500 km í ein landnyrðing úr St. John's, har tríggir fundir hjá Statoil, hin risastóri Bay du Nord, Harpoon og Mizzen, eru.
Soria Moria slott er eitt norskt ævintýr um eina unga hetju, ið ferðast móti einum glitrandi slotti í tí fjara, sum Asbjørnsen og Moe hoyrdu og skrivaðu upp, tá teir góvu út Norske folkeeventyr í árunum 1841 til 1844. Í norskum menta- og andslívi hevur søgan við tí vælklingandi heitinum kveikt fólk heilt frá Theodor Kittelsen, sum málaði Soria Moria slott í 1900 til sjónvarpsrøðina Soria Moria, sum bleiv til í árinum 2000. Nú sæst djúptstingandi norska ævintýrið á Skálafjørðinum.
