Í tíðindaskrivi frá Galerie Focus, sigur Marianna Norðoy, at Eyðun av Reyni letur upp framsýning í Lambagerði 1 í Havn fríggjadagin 11. oktober kl. 16:00-18:00.
Í bókini Eyðun av Reyni (2008) sigur Aðalsteinn Ingólfsson, at "Listamaðurin Eyðun av Reyni ber eins og ein kringur dansari eina andaverð við sær. Tá ið hann málar fyrstu strokini á løriftið, veit hann av sær sjálvum - eins og dansarin, sum hevur vant og vant í óteljandi tímar á bumminum - at rútman, sum hann gevur seg undir, ber hann at enda út á eggina á einum vatnrættum býti, ið verður kallað miðdepil. Hesin miðdepil er ofta í skundi málaður við breiðum pensli, gráur ella svartur, so at hann líkist einum svørtum holi ella einum veðurbardum veggi, sum gerst tann veruligi snúningsdepilin, verkini hjá Eyðuni snúgva seg um. Alt hitt í málninginum skipar seg rundan um hendan miðdepilin, soleiðis at økið niðanfyri brátt umskiftist til eina rokuta forgrund, sum er gjørd liðug við øðiligum slettum og skvettum av ljósi og litum, ið fara hurl um burl tvørtur um løriftið, meðan økið omanfyri er bygt upp við meiri frælsi, altíð við einari samanseting av loddrøttum og vatnrøttum litblokkum."
Framsýningin er opin til 24. oktober, soleiðis: týsdag til fríggjadag kl 15:00-18:00, leygardag kl 16:00-18:00 og annars eftir avtalu við gallaríeigaran Marionna Norðoy á tlf. 229876.