Skip to main content

Posts

Showing posts from November, 2012

Syng føroyskt!

Í dag var syng føroyskt dagur í Útvarpinum. Í fagra sólskininum á middegi fór eg oman á Kongabrúnna, har eg parkeraði bilin og tók nakrar frostmyndir, innan eg fór niðan á Áarvegin og longur niðan í Havnina Umhvørvið innast á Eystaruvág er litfagurt og hvønn dag varnast tú nýggjar litir og rørslur. Her er tað guli liturin meðan tveir piltar ganga framvið. Og niðanfyri hómast jólastjørnan hjá Tryggingini á vagni millum reyða stevnið og frysta bryggjukantin. So niðan eftir Áarvegnum framvið frostklæddu Áarastovubrøðrunum og inn á Kafé Kaspar at eta føroyskt afturvið heimligum útvarpstónleiki. Ein norðuratlantiskan tapas, sum er borðiskur við sild, laksi, turrum fiski, turrari grind, spiki, eplum, skerpikjøti og myrkum og ljósum breyði. 159 krónur og nógmikið til tvey, kanska trý. Ein frálíkur biti, sum eg skal viðmæla, eisini tí at borðiskurin tykist syngja saman við matstovuni, men kanska var tað bara ein tílíkan dag, har øll sungu føroyskt inni hjá Bakar Hansen.

Her er innihald til teldilin

Gerið so væl, her er innihald til allar Føroya teldlar, nú og komandi. Til vinstru omanfyri sæst sjálv bókin Føroya Náttúra , bara sum eitt dømi, og omaná er settur teldilin frá Apple, har eg havi blaðað fram til somu bók, so eg kann lesa hana á skýggjanum. Sama bók er tikin fram á Snar á telduni til høgru og mitt í millum sæst sjónvarpið, sum vísir amerikanska Homeland við donskum undirteksti. Og hví nú tað? Jú, tí at í dag hevur verið sagt í miðlunum frá fleiri lærarakeldum, at nýggju teldlarnir í Stranda skúla hava einki føroyskt innihald. Eg má rætta hesar lærarar. Føroyska innihaldið hevur í mong ár verið so nógv, at tað eru fólk, sum av røttum hava ætlað at tikið hetta megnar tilfar burtur og forða almenninginum at brúka tað. Tí, hví skulu tey nú keypa bøkur úr pappíri fyri krónur og oyru, tá alt kann lesast opið og ókeypis til allar tíðir á øllum netinum? Mest sum allar føroyskar skúlabøkur hava verið tøkar á netinum í fleiri ár. Tað er Google Books sum púra ókeypis, b

Thomas Arge 70

Undir heitinum Í valdi málningsins verður í kvøld kl 19:30 samrøða um Thomas Arge (1942-1978) í Listasavni Føroya. Tað er í sambandi við, at 70 ár eru liðin síðan listamaðurin var borin í heim. Bárður Jákupsson, listamaður, og Nils Ohrt, savnsleiðari, skipa fyri. Fyrireikararnir siga at øll eru vælkomin og tað er ókeypis atgongd. Omanfyri sæst málningurin Salka Valka og niðanfyri sæst ein málningur hjá Tommy Arge av Kongabrúnni frá 1965. Niðast síggjast perman á bók, sum Bárður Jákupsson skrivaði um listamannin í 1998 og frímerki hjá Postverkinum frá 1973.

Orðabókaføroyingar

Vit eru eitt land av væl lærdum og dýrt keyptum føroyingum, sum mest duga at hyggja í handbøkur. Og tær eiga vit nógvar av. Minst tvær av hvørjari. Tvær orðabøkur, tvær sangbøkur, tvær bíbliur. Tvær av øllum. Tá eg gjørdi útvarpssendignar í fyrndini, æt einki human resource . Enn minni var nøkur fólkfeingisstýring , tí eingin visti, hvat fólkfeingi var. Tað vita vit nú, tí vit eiga orðabøkur og handbøkur. Upp í leypar. Men eftir ørstuttari tíð eru øll starvsfólk í heimsins einasta føroyska Kringvarpi kunnað um sína støðu umvegis aðrar miðlar, millum hund og heyk har úti í almenna rúminum. Ivist stórliga, um hetta er framferðarhátturin sambært fólkafeingisstýringshandbókunum . Men kanska tekur tað sína tíð at sodna dýrkepta lærdómin, sum skal tryggja okkara kollektivt uppspardu framtíð, øllum til ljós og vælsignilsi. Men hinvegin. Tað eru eisini tey lærdu, sum siga at endin er nær. Heilt nágreiniliga einogtjúgunda í tólvta, tveytúsund og tólv klokkan tólv tólv. Veit onkur lærdur or

Tøgni í tíggju tímar

Nú sløknaði Útvarpið og tendrar ikki aftur fyrr enn klokkan sjey í morginárini. Tøgn í tíggju tímar. Eg veit ikki um landasorg kann stigbendast, men higartil havi eg ikki hoyrt um tøgn meiri enn ein minutt, tá onkur er farin úr tíðini, ella okkurt minnisvert, sum øll vilja gloyma, er hent. Tíggju tímar. Eg eri púra paff. Varpandi paff. Og undrist samstundis yvir almennu tænastuna the public service . Hvønn er tænastan the service fyri? Og hvat fer almenningurin the public at halda um tænastuna? Nei, eg bara spyrji nú Útvarpið hvarv og Sjónvarpið endursendur ein danskan journalist í amerikanskum illveðri. Nei, eg bara spyrji, who is the public and what is the service?

Syng, Føroyar!

Aftur í ár verður roynt at gera størsta føroyska kórið nakrantíð. Fyrireikararnir siga at hósdagin 29. november kl 15:00 hittast føroyingar við útvarpstólið at syngja kendar føroyskar sangir, saman. Á Facebook skrivar Jóhannus á Rógvu Joensen um at boða frá til Koda: Skriva kekkin til tín sjálvs, tá tú spælir tónleikin hjá tær alment, lær teg at nýta "Mit Koda"! Í sambandi við Spæl føroyskt dagin, 29. november, skipa Futt, Felagið Føroysk Tónaskøld og Tutl fyri skeiði í Kodafráboðan í Tutli á Káta Horni í Havn kl 17:00 So er bara at taka orðini til sín og syngja við klokkan 15. Hvørjir sangirnir verða er ikki upplýst enn, men Útvarpsskráin fyri hósdagin kl 15:03 sigur Syng fo og vertur er Fróði Løksagarð. Á Facebook verður upplýst at P/F Poul Michelsen og Norðurlandahúsið stuðla tiltakinum. Omanfyri sæst okkara mest aktuelli sangfuglur, Hanus Gærdum Johansen, sum eg avmyndaði í Gallerí Focus í vár, og niðanfyri havi eg avmyndað Glen Campbell, syngja Sing, Sing, Sin

Endurmynd av Williami

Ingun Nolsøe og Hansina Iversen hyggja at klippmyndini Njørður og Skata (1977) hjá Williami Heinesen í Gallarí Stephansonshúsi í dag. Hetta er fyrstu ferð í meiri enn tíggju ár, at framsýning við klippmyndum hjá Williami letur upp í Havn. Framsýningin hevur fingið heitið Endurmynd - myndir eftir William Heinesen , og verður at síggja hvønn dag kl 16:00 - 18:00 fram til 19. desember. Tað er stuttligt og hugvekjandi at síggja upprunaligu klippinum, so sum tey eru frá Williamsa hond. At síggja øll løgini, ymsa tilfarið og hvussu alt er sett saman. Omanfyri síggja vit Marmennilin (1976) upp móti veggi og vindeyga í kjallaranum í Stephensonshúsum, meðan myrkrið sýgur niður yvir Havnina ein mánað undan jólum. Gallarí Stepahnssonshús, sum stendur fyri framsýningini, bjóðar eisini fyrilestrar um listina hjá William Heinesen, har ymsir rithøvundar, myndlistafólk og listakøn eru tøk. Zacharias Heinesen og Williamshús hava lánt verkini til framsýningina, sum Tórshavnar kommuna stuðlar.

Løgmaður í klønum tráð

- Hetta er komandi løgmaður, sigur Tóroddur Poulsen turrisliga og peikar á eiturkoppinum í lokkanetinum yvir Føroya løgtingi. Klikk á myndina og tú sært eina grøv á søguliga grasvøllinum. Eingin ivi er um, hvat Tóroddur heldur um politisku leiðsluna, ikki minst førda mentanarpolitikkin, nú Mentanargrunnur Føroya fólks er skerdur við einum fimtingi. Sjónarmiðið í Degi og Viku í gjárkvøldið talaði í somáta fyri seg. Feska prentið byggir á tveir prentsteinar, sum enn eru til skjals, innan teir verða slípaður niður og klárir til onnur grafiskt prent á verkstaðnum. Her sæst Tóroddur við báðum steinunum. Einki er at taka seg aftur í, at Tóroddur er besta íkast í ársins Myndaódn í Steinprenti á Skálatrøð í Havn. Her er Tóroddur við bókini Avbyrgingar, sum er hundraðsíðuúrslit av samstarvi millum rithøvundan og myndlistamannin sjálvan, Føroyaprent og Steinprent, sum gevur út. Tað er undir heitinum Myndaódnin, Billedstorm á donskum, at Steinprent hesa ársins tíð sýnir fram stór

Heilag løta við Hanusi og túsund gudum

Í dag kom Hanus G. Johansen inn á skrivstovuna við nýggju fløguni í hondini. Gerð so væl! Lurta eftir henni og eg hevði verið fegin, um tú ummældi hana. Setti meg at lurta aftaná Dag og Viku og eri púra burtur í henni, nýggju fløguni Á fold eru túsund gudar . Afturvið læs eg góðu orðini hjá Theodor Olsen, presti, um hin tvíoygda Poul F, sum eins og undirspælið bæði er hvast og kínandi. Í annaðkvøld verður fløguaktuelli Hanus at hoyra í Sumba, har yrkjarin Poul F. Joensen (1898-1970) vaks upp. Hanus sigur, at síðani sjeytiárini hava søvnini sjáldan verið meir enn armslongd burturi og nógvar av yrkingunum eru prentaðar inn í sálina. Fløgan, ið Mikael Blak hevur framleitt og Jónas Bloch og Theodor Kapnas hava tikið upp og ljóðblandað, telur ellivu tekstir hjá Poul F, sum Hanus hevur sett lag til. Átta uppruna tekstir og tríggjar týðingar eftir skotska Robert Burns, svenska Gustav Fröding og týska Georg Friedrich Daumer. Ljóðmyndin byggir á landslagið hjá Mikael Blak, sum vit

Steinbrá

Mikudagin 21. november 2012 var triði ársaðalfundur í felagnum Steinbrá, sum er stuðulsfelag hjá grafiska verkstaðnum Steinprenti. Nevndin varð afturvald. Formaður er Birgir Kruse, skrivari er Bárður Jákupsson og kassameistari er Gyðja Hjalmarsdóttir Didriksen. Eykalimur er Kinna Poulsen og grannskoðarar eru Heri Mørkøre og Kjartan Kristiansen. 156 limir eru í felagnum. Árliga limagjaldið er 500 kr. Fyritøkur og stovnar kunnu eisini verða limir fyri 2000 kr um árið. Fyri limagjaldið ber til at keypa grafiska list í Steinprenti, har Jan Andersson er savnsleiðari. Tað var hann, ið tók myndina omanfyri á fyrsta aðalfundi felagsins. Fyritøkur og stovnar brúka eisini møguleikan av vitja í Steinprenti og at gera serlig prent, eitt nú til jóla. Síðani 1999 hevur Arbeiðsloysisskipanin havt eitt spennandi samstarv við Steinprent. Fríggjadagin 23. november 2012 kl 16:00 verður árliga Myndaódnin í framsýningarhølunum, har til ber at síggja prent frá árinum, ið nú rennir út. Stórur áhugi

Nei, eg umboði ikki free lancarar

Í Degi og Viku týskvøldið var kjak við støði í mínum egna bloggi frá degnum fyri, har eg fyri egna rokning seti fram ynski um at føroyska fjølmiðlamyndin verður skrúva til eina tíð og ein frekvens, tá Útvarp og Sjónvarp vóru hvør sær. Bráddliga hoyri eg framleiðaran í oyranum á vertinum undir liðini á mær siga, at eg er ein av teimum free lancarum, sum ikki skulu koma til arbeiðis í Útvarpinum longur. Starta við tí! WTF? Hugsaði eg við mær sjálvum, skal eg fyri opnum skermi fara at grenja um at Katrin nú brýtir fortreytirnar, premissin, fyri samrøðuni um at separera Útvarp og Sjónvarp? Nei, hugsaði eg, tað gevur onga meining. Men eftir at hava sovið uppá tað, má eg sanna, at slík manipulasjón og undirmininering smakkar mær so illa, at eg frá hesum bloggi, sum var støðið undir avtalaða prátinum í Degi og Viku , má koma við einum inniklemmaðum miðlafreti, um at eingin føroyskur free lancari er umboðaður av nøkrum felag ella persóni, heldur ikki av mær og enn minni av láglønarfelagnum