Meðan vit liva í einum veruleika, sum politiskt enn er merktur og heftur av einum serstakliga trongum mentanar- og listasýni, hava vit lukkutíð eitt meira privatpersónligt vítt og aktivt uppsøkjandi mentanarsýni, sum av og á gevur okkum upplivingar, ið eru óvæntað sjáldsamar.
Ein tílík var í Løkshøll í Runavík leygarkvøldið, har Pauli í Sandagerði og Sigmund Poulsen buðu til frumframførðslu av tónleikaverkinum Dropi ert tú við undirtitlinum Sangur um lívið.
Eitt varisligt ekkó av samstarvinum kring sangleikin Jesus og Makedonarin fyri fjøruti árum síðan.
Eins og tá hevur Pauli skrivað tónleikin, sum nú er fyri kvinnukór, strúkikvartett, klaver og bass, og Sigmund hevur skrivað tekstin.
Hann er í seks pørtum við heitunum Keldan, Løkurin, Vatnið, Áin, Fossurin og Havið. Tónin er javnt og høgt insiterandi, væl balanseraður í rúminum, men við støði í teim seks kvinnurøddunum ytst í vinstra borði, beint framman fyri, har eg siti.
Við ljóðmyndini fái eg ta fatan, at tónin er dropin, ið holar út steinin, tað støðuga og tað skiftandi, sum er grundsjónarligi karmurin, og í tekstinum skapar treytirnar fyri lívi og deyða, ofta burleskt og ongantíð skipað religiøst. Ein lívssyklus, settur upp í panteistiskum optikki, sum ber boð um, at alt er íbygt, og at ond er í øllum.
Seyrar undan kirkjugørðum lívið út í vatnastreym
Flýtur dovið móti stóra fossi
- sílamurtadansur
Seyðasparlur, rossatøð
Blaði í bókunum á hillunum, jú flest øll heimligu skøldini hava yrkt um vatnið og vætuna, ið kom, fremst í huga er mær beinanvegin Rikard Long.
Dropi ert tú er eitt hugtakandi verk at hoyra laiv í Løkshøll, nú kommuval stendur fyri, og tú í tí gerandisliga ikki kanst koma uttanum, at náttúran skal borast og gatast, skulu vit liva. Tað er politiska mantra'in. Skulu vit liva, skal tað síggjast. Grótbrot á fremstu nesum, tunnlar tømdir fyri grót, surprise, har er grót í teimum, og so turrløgdum áum frá Veðranesi og norðureftir.
Sum, í mínum oyrum, eitt sarkastiskt aftursvar til politikaran, ið sigur seg ikki gera seg inn á náttúruna, tá hann tekur ánna burtur, hoyri eg afturvendandi kórsvarið ”Eg eri her, eg eri her”. Hvør skal siga ”Hevndin er mín, hevndin er mín”.
Eitt hugvekjandi verk til áminning í eini tíð við sjáldsama tiltakandi náttúruoyðileggilsi.
Og so eru tað heitini á satsunum.
Tey hefti eg við fyrstu bøkurnar í heimstaðarlæru, tá Pauli og eg arbeiddu á sama skúla, og hann hevði eitt kór, ið slapp at syngja við Bjørn Eidsvåg, sum Norrønafelagið hevði á vitjan. ”Eg ser”, sum kom út á Kirkelig Kulturverksted, sum eisini gav út sangin ”Midt i den brennande byen” og vit skrivaðu upp tankar um brennandi býir í okkara døgum. Og eg síggi sama kór, Cantabile, fjøruti ár seinni. Og Sigmund, Carsten og eg syrgdu í tríggjar tímar á Bryggjubakka, tá John Lennon varð skotin fjøruti ára gamal í 1980.
Og nú henda sama leygardag var innilig jarðarferð í stillum, har eini sangurin var eftir Martini Joensen, "Uttan Teg", sum kvøldið fyri var í sprelska Varpinum.
Onkuntíð kann tað henda, at tú kennir teg komnan í ein andglett, har kórið lukkutíð heldur fast í firmamentinum og kann bera fram eina nemandi signing við orðunum ”Eg eri her, eg eri her”. Takk fyri upplivingina og til lukku við frumframførsluni.
