FedEx er heimsins størsta og skjótasta flutningsfelag. Men
ikki øll lond eru til reiðar at taka ímóti so vælsmurdum flutningi. Eitt nú
slow landið Føroyar.
Útvið fýra ár havi eg fingið pakkar frá einum altjóða
bókaforlagi, HarperCollins, sum helst eisini er heimsins størsta. Tí brúka tey
altíð ein professionellan speditør, FedEx ella líknandi, og rinda í dýrum
dómum, so alt kemur fram í røttu tíð til rættan móttakara, sum í hesum føri situr
í Føroyum og skal góðkenna tilfar úr Glasgow, innan tað verður prentað í
Hongkong.
Í hesi fýra ár hevur nevnda forlag sent pakkar, til dømis eitt
proof print pappírsrull at góðkenna, innan ein ávísan klokkutíma ein ávísan arbeiðsdag.
Men í øllum hesum førum, og tað hundrað prosent, ja 100%, er eingin av pakkunum
komin á mítt borð uttan fjant, fjas og roks. Ikki ein einasti ein. Tá tosað
verður um altjóðagerð, enntá við øllum heiminum sum arbeiðsevni, er tað eitt sindur
snópisligt at vera føroyingur. Havi hug at senda Ben Arabo í Sjá ein vinarligan
tanka og reiðiliga tað.
Í London og Glasgow haðani flestu pakkar frá hesi fyritøku
eru sendir, undrast tey yvir hetta óframkomiliga pakkaland, Føroyar. Alt, sum
ber til í øllum heiminum, ber ikki til í Føroyum. Ikki bara so hissini ein
tilvildarligan dag, men aldrin. Ikki ein einasti pakki. Ongantíð.
Einaferð varð góðkenningarprent, proof print, av einum
veggjakorti av øllum heiminum sent higar við FedEx. Tá evstamark nærkaðist og
avsendarin einki hoyrdi úr Føroyum, spyrja tey, nær eg ætli mær at góðkenna senda
prentið. Eg veit einki um pakkan, eitt rull, sum langt síðani skuldi verið á
mínum borði, og spyrji tí, hvat tey meina við. Fái straks eina slóð til talgilda tracking, sum svart uppá hvítt vísir farleiðina hjá pakkanum úr London.
Hann hevur verið í Føroyum í fleiri dagar, og er farin avstað aftur, uttan at
nakar veit av. Sølustjórin hjá altjóða bókaforlagnum øtast í London og sama
gera tey hjá FedEx í sama býi. Ikki minst yvir óhøvisku avgreiðsluna hjá
Modultransport í Kastrup, sum alt ov seint og fyri hópin av eykagjøldum, kvøldgjøldum, úrtíðargjøldum og útberingargjøldum vil senda mær vøruna aftur til Føroyar við Norlink tá
allar freistir longu eru farnar. Eg noyðist at halda meg til eina skermmynd á
telduni, tí einki pappír, proof print, kemur fram. Eg øtist. Vit øtast. Øll
øtast. Men einki er at gera. Vøran kom ikki fram til tíðina. Aftaná er alt ov
seint. So miskunarleys er tilveran og arbeiðsdagurin. Aftaná er alt ov seint. Soleiðis
skrivar FedEx um akkurát hesu hending:
I’m horrified to read the comments below, we ship proofs
like this via FedEx at extra expense precisely because you can usually rely on
them for an exemplary service. I can see
from the tracking that it is showing as being in Torshavn on Wednesday prior to
the estimated delivery of Friday (today) - I can’t imagine it’s exactly a large
place so can’t see why it wasn’t delivered then. There certainly shouldn’t be anyone trying to
add extra fees for delivery when we’ve paid for it all. I’ll raise this now
with FedEx and see what they have to say about it, the online tracking shows
the parcel as being back in Denmark this morning but still shows an estimated
delivery of Friday which I can’t see how this can now happen.
Nú komu aftur tveir pakkar, sum hava ligið hjá Taks í snøgt
hundrað dagar, ja 100 dagar, tí teir kundu ikki avgreiðast. Tað sigur Taks í
tveimum brøvum við váttan frá tollara. Niðasti upplýsingar sigur, at pakkin
inniheldur bøkur. Uttan á øllum umrøddu pakkum stendur, this package contains
books, innihaldið er bøkur. Hvør er so trupulleikin? Førleikin at lesa?
Førleikin at lyfta? Førleikin at bera? Førleikin at veita tænastu? Nei, eg bara
spyrji. Bøkur eru bøkur. Eisini í pakkum hvønn einasta dag í árinum, sum nú er
farið at halla. Men enn er vón fyri føroyskum skrankapávum. Sigst, at eitt nýtt
ár er beint handan hornið. Alt tað besta verður ynskt skrankapávum í nýggja
árinum. Haldið fast um eftirlitið og forðingarnar, tí Føroyar eru vissuliga verdar
at verja. Og so eru tær so smáar eisini. Tað er at vera tvífalt á varðhaldi. Gott
nýggjár allir skrankapávar. Hvørt ár er framtíðin í tykkara hondum.
