Í hesum døgum eru harudagar í Áarstovu. Undir leiðslu av Jógvani Steingrím Rasmussen, matstovuleiðara, longst til vinstru, standa teir allir til tína tænastu við haru, sum er skotin í desembur, keypt frá Leif Høj í Leirvík, og tilgjørd eftir teim mest hugtakandi gastronomisku listum og sniðfundigheitum til føroyska góman, so tú verður púra paff, tá tú kemur til japansku leyk dashi súpanina í øðrum umfari. Gastronomisku harumeistararnir hjá Jógvani í køkinum í Áarstovu eru frá vinstru: Skander og Yassime, sum báðir eru úr Tunis, og so føroysku Eiler og Hørður, til høgru.
Eftir at Jógvan hevur skonkt eitt glas av svalliga turrari Deutz sjampanju, kemur Anna frá Ukraina, við einum vermouth kokkteyl, sum byggir á sólber og koriander við blóðappelsin omaná. Kokkteylurin fylgir fyrsta rætti, sum er ein brellbiti við harusúltu, løgd í romm og kryddað við koriander, chartreuse og mirin, borðreidd við nógvum og sterkum karsa úr Kvívík.
So kemur forrætturin, sum longu nú, helst, er óvæntaða hæddarpunktið á máltíðini. Tað er japansk dashi súpan við ráari haru, loyptum eyggjareyða, brestandi sinnopskornum og fimm sløgum av leyki, við heitari súpan stoyttari omanyvir, á sama hátt, sum tey gera við fiskasúpan í grannamatstovuni Barbara.
Og hetta við interaktiviteti riggar væl, tí tað brýtur inni í matskránna og ger nakað óvæntað, sum stuðlar upp undir eina góða uppliving av tí felags gerð og atferð, sum ein máltíð kring sama borð altíð er. Framúr. Japan og Føroyar taka lógvatak við hesi súpan. Instant classic. Serliga takkað verið smáu sinnopskornunum, sum vaksa seg stór og bresta í munninum. Ótrúlig uppliving. Afturvið japansku harusúpanini fáa vit nøtuturt sjerry úr Andalusia.
So kemur ein millumrættur við ráari haru, sum er hondskorin tartarur, eftir surf and turf metoduni, har sjógvur møtur landi og tørnar saman við Gilliardeau ostru og villini soppum við turkaðum rogni, bottarga, sum japanarar siga, rivið omaná, meðan vit hyggja. Afturvið verður skonkt hitt fínasta og best avstemmaða pinot noir reyðvín úr Suðurafrika. Sterkt í øll borð.
Nústani kemur høvuðsrætturin, hin fjórði, sum ber stolta heitið Hara à la royale, føroysk skotin hara, flett beinanvegin, tilgjørd eftir kongaligari, helst franskari, fyrimynd, tilgjørd við djúpt konsentreraðari sós, borðreidd við gásalivur, foie gras, trøfflum, smáum føstum eplum og grønum salati, ið eins og allur annar grønur vøkstur er úr Kvívík. Leirviksharan hevur ligið í reyðvíni í fýra dagar og paringin við pomerol vínið úr Bordeaux er framúr. Smakksterkt við góðari uppliving av kjøtstrukturinum av mangan turru haruni, sum her er hildin upp móti øðrum strukturum, smakkum, sós og víni, so tú setur teg væl nøgdan afturá og fær næstan hug at festa í eina kubanska sigar.
Fimti og seinasti rættur er dessertin, sum er sjokuláta mousse, køka, ganache og sorbet við kremi, sum Jógvan sproytar omaná. Aftur er tað interaktiviteturin, sum riggar væl í borðreiðingini. Afturvið skeinkir Anna portugisiskt portvín av frágerða Grahams slagnum. At enda er kaffi og eitt glas av spanskum Ximénez brandy.
Uppliving av føroyskari haru, borðreidd á henda hátt, er gastronomiskt nýskapandi, serliga tá vit hugsa um japansku dashi súpanina, sum var annar rættur av fimm. Besta eg havi fingið undir góman á matstovu í langa tíð, serliga sinnopskornini í eftirsmakkinum. Manga takk fyri tað, og hugnaliga borðhaldið og prátið.
Hetta vikuskiftið eigur tú at unna tær eitt harukvøld í Áarstovu.
Hvat viðvíkur haru í Føroyum, og hvussu tær fyrstu harur komu higar, fari eg at vísa til henda blogg úr Áarstovu í 2016, tá vit royndu haru úr Hvannasundi. Væl gagnist og manga takk fyri í kvøld!
