Av øllum verður lovað

Tá eg hoyrdi henda nýggja sangin, ið er stevfast reglubundin, og tó lættur sum ein fjøður, mátti eg á netið at leita eftir NordVisa og Visans Vänner, so norðurlendskur er sangurin hjá Steintóri og Eyðuni.

Norðurlendskur í botn og grund.

Ikki sum nakað avmarkandi, men bekennandi seg til eina siðvenju, ið alt ov leingi hevur ligið í dvala, og kanska hildið seg frá at bjóða nakað nýtt, tí norðurlendski samhugin og samleikin er uppifjaraður, nú vit hava havt enskt upp í saman í evropeiskum sangkappingum. Í hesi hevd vil eg aftur til upprunan, tann føroyska í tí norðurlendska. Har rakar hesin sangur í blett, er eitt beinrakið plettskot.

Undir heitinum, "Av øllum verður lovað", sum gevur ein farra av tíðarleysum sálmi, eru orðini um ein friðleysan elskara, mannin, sangurin er ognaður, sum eftir reikan, hevur funnið frið.

Eyðun sigur, at ellinta oktobur í fjør mistu vit okkara góða vin, Hanus G. Johansen. - Steintór og eg hava gjørt ein sang í andanum hjá Hanusi og Poul F. um ørandi elskhug, sum illa letur seg tálma. 

So er terminali karmurin settur. Hann ger sangin syrgnan, men innvovni reyði tráðurin, og ikki minst leveringin, framførslan og sangstílurin, eru varisliga sjálvspeiandi á ein elegantan hátt, serliga í útganginum á hvørjum ørindi, har Eyðun rakar ein djúpt breiðari tóna og úttrykk, enn eg fyrr havi hoyrt. Hesin breiði pensilin spælir undirfundiga væl upp til melankolska siðbundna vísutónan, ið liggur til grund fyri bæði orðum, instrumentering og lagi.

Einasta orð, ið skurrar upp móti tíðarleysa hválvinum, sum sangurin hegnisliga spennur upp, er 'vikur' í næstseinasta ørindi. Tá nærkast vit okkum ov nógv táttayrking.

Umframt at syngja, spælir Eyðun spanskan gittar og gittalele, sum er eitt bland av gittara og ukulele, Kim Hansen klaver og Hans Poulsen spælir bass, allar strúkarar og hevur miksað og staðið fyri mastering. Steintór Rasmussen eigur orðini og Eyðun lagið.

Minningarløtan um Hanus G. Johansen er blivin eitt stuttliga sorgblítt summarbros. Takk fyri at deila tað, og at blása nýtt lív í norðurlendska vísuhevd - á føroyskum!