Fýratúsund krónur fyri flakið. So høgur kann endaprísurin verða, tá ið eksklusivar italskar matstovur rinda fyri ein bita av føroyska Bankatoskinum, ið tey meta sum heimsins besta til saltfisk. Tað sigur Jens Martin Knudsen, framleiðslustjóri á Vaðhorni.
Einki er at ivasti í, at toskur av Føroyabanka er besta, men samstundis eisini knappasta, saltfiskabrand úti í heimi. Oslakkur Frederiksberg hevur spurt seg fyri hjá eldri ættarliðum, og hevur eftir teirra forskriftum gjørt klippfisk til tvey kvøld í Barbara Fish House, 13. og 14. november. Helst er hetta fyrsti klippfiskur, ið er virkaður í Føroyum í nýggjari tíð.
Tað var fyri trimum árum síðan, at íverksetarar í frambrúsandi føroysku matstovuvinnuni fingu samband við Oyvind av Skarði í Vinnumálaráðnum og fólk á Havstovuni, at Bankatoskurin aftur kom á heimliga borðið.
Tíðindini bórust á altjóða mat- og ferðabloggum, og um hetta mundið í fjør kom eitt par úr New York higar, bara fyri at sessast í Áarstovu og smakka ein ramsaltaðan part av føroyskari søgu, sum nú brá sær undan kavi frá eini tíð, tá heiðurskrýndu handilssambondini vóru katólsku londini har suðuri í Evropa.
Hóast hon er lítið lýst í føroyskari søgu helt henda vinna hjá føroyingum á Føroyabanka lívinum uppi. Bankin var álitið, sum vit kunnu lesa um hjá Martini Joensen og síggja á gulnaðum heiðursbrøvum hjá Kjølbro og familjufyritøkum sum Thomsen, Dahl, Mortensen og S.P. Petersen.
Vit kunnu siga, at nýggja varisliga átakið at enduruppfinna hesa heiðurskrýndu útflutningsvinnu, er eitt destillat úr Føroya søgu, tá handilssambond knýttu okkum til fremmandan átrúnað, hin katólska, og teirra siðir. Vónandi kunnu hesi sambond koma undan kavi aftur og skapa nýggj sambond til ekostiska ferðastaðin í norðuri.
Fríggjakvøldið er longu útselt, men møguleiki er at bíleggja borð til leygarkvøldið, 14. november, á Barbara Fish House.
Myndirnar niðanfyri eru tiknar á Seglloftinum hjá T.F. Thomsen á Tvøroyri. Har síggjast fleiri av teim skabelónum, sum vórðu brúkar at merkja útflutningsvørurnar við.
