Mynd: kvf.fo
Í dag varð ringur dagur fyri afturhaldið. Ítróttin hevur vunnið stórt, og seinastu dagarnar hevur føroysk filmsgerð og bókmentan vunnið størstu norðurlendsku virðislønir.
Samstundis hevur evsta politiska løgfrøðisskipanin gjørt av, at umval skal verða í Runavík, tí tey hýsa einum ørvitisfiski, sum kanska ikki býr í kommununi, samstundis sum løntir politikarar, menn og kvinnur, á tingi, fara í tríggjar bólkar í eini etiskari mótstøðuroynd, tí onnur vilja dagføra eina lóg um fosturtøku frá 1956.
Øll onnur mál eru eftir hesum at døma ikki etisk. Ikki minst heimsins størsti djúpsjóvartunnil og tær milliónir, har fara úr føroyskum lummum. Teirra millum er einki flokspolitiskt ivamál, hóast veljarin einki fær at vita.
Er tað kanska so, at stórvinnandi ítróttafólk, mentafólk og listafólk, sum á øllum økjum í hesum døgum definera tjóðina, og so eisini skilliga stuðlandi vinnulívsfólk í sjónvarpssendingini í kvøld, ið øll tykjast vilja skapa einar sjálvstøðugar Framburðsføroyar, nú eru komin hartil, at vit hava ein trupulleika - eina deyðvekt - sum einsamøll forðar narrativinum um einar sjálvstøðugar Føroyar?
Er tað kanska komið hartil, at vit mugu fáa eina borgaraverju móti politiskum ódugnaskapi?
Nei, eg bara spyrji, nú øll ítróttar og mentafólk vinna og tað stórt í landsins navni, meðan landsins politikarar, menn og kvinnur, liggja bakk.
Eg bara spyrji, innan eg fái hondbóltsarmarnar niður.
Comments