Hóast religiónir ikki hava ein høvuðsstað á sama hátt sum jarðisk lond, er Jerúsalem ein av heimsins týdningarmestu heilagu býum hjá fleiri stórum religiónum.
Jerúsalem er heilagasti býur í jødadómi, ein av týdningarmestu býum í kristindómi og umframt Mekka og Medina, hin heilagasti býur í islam.
Ísrael sigur, at Jerúsalem er høvuðsstaður landsins, og palestinarar síggja Eystur-Jerúsalem sum høvuðsstað í einum framtíðar palestinskum landi.
Eitt heilt uppslag er í føroyska skúlaatlasinum frá 2014,
sum viðger hesi viðurskifti undir yvirskriftini Miðeysturmálið.
Fyri fyrstu ferð í øldir hendi tað í dag, pálmasunnudag, at ísraelska lørgrelan tók sær rættin at forða fólki at sleppa í kirkju í teirri heilagu Gravarkirkjuni, kirkjuni við heilagu grøvini, Church of the Holy Sepulchre.
Macron í Fraklandi og Meloni í Italia eru millum tey mongu, sum hava mótmælt:
Eitt alment skriv, sum í hesum sambandi hevur verið frammi allan dag, er hetta:
Felags Fráboðan frá Latínska Patriarkatinum í Jerúsalem
og Umsitingini av Heilaga Landinum
skrivað í hinum Heilaga Býnum
Jerúsalem
pálmasunnudag, 29. mars 2026
Í morgun forðaði ísraelska løgreglan Latínska Patriarkanum í
Jerúsalem, Hansara Eminensu Kardinal Pierbattista Pizzaballa, leiðara fyri
katólsku kirkjuna í Heilaga Landinum, saman við Kustoduni fyri Heilaga Landið,
hinum háttvirda Fr. Francesco Ielpo, OFM, almenna verjanum av Gravarkirkjuni,
at fara inn í Gravarkirkjuna í Jerúsalem, tá ið teir vóru á veg at halda
pálmasunnudagsmessu.
Teir vórðu steðgaðir á vegnum, hóast teir fóru í stillum og
uttan nakra hátíðarliga skrúðgongu ella seremoni, men vórðu kortini noyddir at
venda aftur. Hetta hevði við sær, at fyri fyrstu ferð í øldir vóru leiðararnir
fyri kirkjuna forðaðir at halda pálmasunnudagsmessu í Gravarkirkjuni.
Hendingin er eitt álvarsamt dømi um manglandi virðing fyri
kenslunum hjá milliardum av fólki kring heimin, sum júst hesa vikuna venda
eyguni móti Jerúsalem.
Kirkjuleiðararnir hava víst fulla ábyrgd og hava, síðani
kríggið byrjaði, fylgt øllum álagdum avmarkingum: almennar savningar vórðu
avlýstar, luttøka var bannað, og fyriskipað varð, at hátíðarhaldið kundi
sendast út til hundraðtals milliónir trúgvandi kring heimin, sum í páskatíðini
venda eyguni móti Jerúsalem og hini heilagu Gravarkirkjuni.
At forða Kardinalinum og Kustoduni - teimum, ið bera hægstu
kirkjuligu ábyrgd fyri katólsku kirkjuni og Heiløgu Støðunum - at fara inn, er
ein óhóskandi og greið yvirmeting.
Henda knappliga og grundleggjandi skeiva avgerð, merkt av
óviðkomandi atlitum, er eitt ógvusligt frávik frá grundleggjandi meginreglum um
rímiligheit, trúarfrælsi og virðing fyri Status Quo.
Latínska Patriarkatið í Jerúsalem og Umsitingin av Heilaga
Landinum vísa kristnum trúgvandi í Heilaga Landinum og um allan heim djúpan
samhuga, nú bøn á einum av mest heilagu døgum kirkjuársins soleiðis varð
forðað.
Comments