Avvísta IOC málið gevur okkum høvið til aftur at hyggja at
samgonguskjalinum hjá landspolitisku heimaflokkunum og framhaldandi mjólkanini
hjá ítróttini í tí almenna heimageiranum nú og framyvir.
IOC er ein nýggj avbjóðing, og fær ivaleyst tey flestu at
skilja, at vit mugu gerast ein sjálvstøðug tjóð.
Undir yvirskriftini Mentamál síggja vit í Samgonguskjalinum
tíggju punkt, har tey fyrstu átta eru av slagnum, sum Jacob Haugaard fann uppá
sum eina parodi yvir lyfti hjá øðrum politikarum, tá hann stillaði upp í 1994,
og bleiv valdur, helst uttan at hava ætlað og enn minni væntað tað. Tey
seinastu tvey eru av serligum ørindaslagi, tí mentanar- og fíggjarpolitiskt
venda tey sær beint móti IOC og ÍSF, sum eru vagnarnir, ið fara at finna okkum
frælsi til egna umboðan úti í ítróttaheimi og kanska heimi yvirhøvur.
Hesi eru
mentamálini hjá samgonguni:
Føroyska málið og mentanin eru grundarsteinurin undir okkara
samleika. Tað er av alstórum
týdningi, at hesi verða vard og styrkt á øllum økjum. Noy dekan. Og man nakar
vera ósamdur í tí?
Vit skulu
virka fyri, at framleiðsla av føroyskum tilfari til børn og ung verður raðfest
á øllum miðlapallum. Ja, tað er sanniliga vert at virka fyri. Neyvan er nakar,
sum ikki tekur undir við tí.
Teknmálstulking
skal styrkjast. Ja, tað er sjálvsagt.
Listin
skal stuðlast, men hon skal ikki stýrast, og vit vilja, at stuðulin til list
verður raðfestur hægri. Góð orð. Men hvat fylgir við orðunum? Er tað sum í
tanker er toldfri?
Vit
vilja, at fleiri børn og ung skulu fáa atgongd til musikkskúla. Ja, øllum skal
standa í boði at fáa atgongd til musikkskúla. Gud náði tann, sum sigur tað
øvuta, ella forðar ávísum oyggjum og bygdum at sleppa á musikkskúla.
Siðbundna
mentanin verður styrkt. Ja,
har skal sterkt stev takast at tryggja tað siðbundna, tað er klárt.
Skipanin
við miðlastuðuli verður endurskoðað. Ja, tað skal eg lova fyri at miðlastuðulin
er endurskoðaður. Herrejemine.
Fólkakirkjan
skal kunna dagføra kirkjubygningarnar til dagsins tørv, eitt nú viðvíkjandi atkomuviðurskiftum.
Ja, kirkjan skal kunna møta dagsins tørvi. Klárt.
Føroyar
skulu hava limaskap í altjóða olympisku nevndini, IOC. Now you're talking. Her
er orðið skal brúkt og adressan og endamálið er klárt. Greið politisk tala.
Ítróttar-
og frítíðarfelagsskapir skulu hava góðar umstøður, og ÍSF skal stuðlast
fíggjarliga. Aftur her verður tosað greitt, adressa verður sett á og her verður
fyri fyrstu ferð í mentanarkapitlinum hjá samgonguni hetta fýra ára skeiðið sagt
og staðfest, at vit tosa um fígging og ikki bláa luft. ÍSF skal fíggjast.
Soleiðis liggur
landið.
Gott, vit
hava IOC og ÍSF sum politisk leiðsluamboð at náa fullkomna føroyska
tjóðarfrælsinum. Um ikki annað, so sum eina áminning.

Comments